Me urdhër të Bajazitit II u ngrit qendra e parë urbane islame e Beligradit shqiptar, bërthama e së cilës përbëhej prej xhamisë me emrin e tij (e mbiquajtur Mbret), teqesë së sektit Halveti, medresesë, imaretit, shkollës për dije fillestare dhe disa objekte të tjera plotësuese, që e rrethonin faltoren.
Nga të dhënat që kemi deri më sot ky kompleks përbën kullijen e parë që është ndërtuar në vendin tonë. Kullia mendohet të jetë ndërtuar midis viteve 1481-1492. Sot, nga ky kompleks gjenden xhamia Mbret, teqja e Xhelvetive (Halvetive), konakët e saj dhe teqja e Sheh Qerimit.