Monumente në Skrapar – Corovodë

Qëndra Historike dhe Zona e Mbrojtur

Në listën e monumenteve të shpallura për rrethin e Skraparit, gjenden njëzetë objekte monument kulture. Këto objekte janë të gjinisë së ndërtimeve mbrojtëse (fortifikime), pika dhe vendbanime prehistorike, vepra inxhinierike, hidrauliko-inxhinierike, objekte kulti, varre monumentale dhe banesa fshatare.  Ndër keto mund të përmendim:

  • Pika prehistorike në fshatin Vlush, një vendbanim i vogël dhe ende i pagërmuar sa duhet, por që hyri në hartën arkeologjike të Shqipërisë, sepse është vendbanimi i vetëm, gjer më sot, që i takon fundit të epokës së mezolitit e fillimit të neolitit.
  • Kalaja në Majën e Gorës në fshatin Potom, e ngritur në një pikë zotëruese me lartësi 1400 m mbi nivelin e detit, prej nga kontrollohet një pjesë e madhe e luginës së Osumit, Kapinovës dhe Tomorricës. Maja e banuar e kodrës ka formë afërsisht drejtëkëndore dhe një sipërfaqe prej 2 ha tokë afërsisht dhe është e rrethuar me mur të thatë i ndërtuar me gurë të papunuar mesatarë e të mëdhenj, i cili ruhet me ndërprerje në një gjatësi deri në 221m.
  • Rrethi i kalasë në fshatin Prishtë, zbuluar në vitin 1970, gjatë një ekspedite përnjohëse në luginën e Osumit. Hyrja e kalasë gjendet nga perëndimi. Për nga mënyra e ndërtimit të murit, kalaja e Prishtës lidhet drejtpërdrejtë me atë të Peshtanit. Sipas studiuesve, sipërfaqja e kufizuar (rreth 3 ha) dhe mungesa e një jete intesive përcaktojnë si tipar kryesor të qytezës karakterin ushtarak.
  • Kalaja në Bregun e Koronit në fshatin Bargullas, ngritur në një kodër me kuotë 806,8 m mbi nivelin e detit. Në krye kodra kurorëzohet me një shesh në formën e një trekëndëshi me brinjë të lakuara. Sheshi i kodrës ruan gjurmët e një rrethimi me mure guri. Sipërfaqja e rrethuar është gati 600 m². Trakte muresh shihen më qartë në pjesën lindore e jugperëndimore. Si teknikë duket se afrohen me atë të Mbolanit. Në gjendjen e tyre të sotme, ato pothuajse janë rrafshuar me tokën.

Na kontaktoni

Në rast se keni një kërkesë, ankesë apo një opinion për sa i përket objekteve që kemi nën mbikqyrjen tonë ose shërbimit që ju është ofruar, ju lutem të na kontaktoni.